Sentyabrın 23-də Azərbaycan Respublikasının Prezidenti yanında Dövlət İdarəçilik Akademiyasında keçmiş fransız diplomatı və tanınmış alim Filip Moro Defarjın “Millətlərin öz müqəddəratını müəyyən etməsi” mövzusunda məruzəsi dinlənilmişdir.
Tədbiri giriş sözü ilə Dövlət İdarəçilik Akademiyasının tədris işləri üzrə I prorektoru professor Əlikram Abdullayev açaraq qonağı və tədbir iştirakçılarını salamlamış, Fransadan dəvət olunmuş qonağı təqdim etmişdir. Fransa ilə Azərbaycan arasında siyasi, iqtisadi, mədəni, elmi sahədə münasibətlərin ilbəil inkişaf etməsindən, xalqlarımız arasındakı dostluq əlaqələrindən və bu əlaqələrin əhəmiyyətinin vacibliyindən ətraflı danışaraq mövzu ətrafında geniş məlumat vermişdir. Natiq F.M.Defarjin Paris Ali İdarəçilik Məktəbinin məzunu, peşəkar diplomat və tanınmış alim olmasından, Fransa Beynəlxalq Münasibətlər İnstitutunda RAMSES proqramına rəhbərlik etməsindən, “Beynəlxalq münasibətlər”, “Geopolitikaya giriş”, “Qloballaşma”, “Dünya quruluşu”, “Rayonların idarəedilməsi”, “Avropa hara gedir?”, “Anlayışı olmayanlar üçün Geopolitika”, “Hərb və ya Sülh sabah üçün?”, “Beynəlxalq siyasətin əsas konsepsiyaları” kimi çoxsaylı kitabların müəllifi olmasını bir daha tədbir iştirakçılarının nəzərinə çatdırmışdır.
Daha sonra tədbir iştirakçıları mövzu ətrafında fikir mübadiləsi və müzakirələr aparmışlar. Filip Moro Defarj maraqlı məruzə ilə çıxış etdikdən sonra professor-müəllim, tələbələr və müdavimlərin suallarını cavablandırmış və Akademiya rəhbərliyinə öz dərin təşəkkürünü bildirmişdir.
Foto
DİA-nın Mətbuat və İnformasiya Xidməti
|
Dövlət