DİA-da “Heydər Əliyev məktəbi”nin növbəti məşğələsi keçirilmişdir

Mayın 19-da Azərbaycan Respublikasının Prezidenti yanında Dövlət İdarəçilik Akademiyasında “Heydər Əliyev məktəbi”nin növbəti məşğələsi keçirilmişdir.
Məşğələni Akademiyanın rektoru, əməkdar elm xadimi, prof. Seyfəddin Qəndilov açaraq Ulu Öndər Heydər Əliyevin fəaliyyətinin bütün dövrlərində respublikamız üçün gördüyü işlərdən, Azərbaycan dövlətçiliyinin bərpası, ölkəni parçalanmaq təhlükəsindən qurtarmaq üçün həyata keçirdiyi tədbirlərdən, müstəqilliyimizin qorunub saxlanılması istiqamətində apardığı məqsədyönlü daxili və xarici siyasətin çoxşaxəli istiqamətlərindən bəhs etmişdir. XX əsr Azərbaycan tarixinin inkişaf mərhələləri, Azərbaycanda ictimai-siyasi sabitliyin qorunub saxlanılması, respublikanın beynəlxalq aləmdə nüfuzunun artması istiqamətində Heydər Əliyevin apardığı siyasətdən söz açmış və həmin siyasi kursun bu gün möhtərəm Prezidentimiz İlham Əliyev tərəfindən uğurla davam və inkişaf etdirildiyini qeyd etmişdir. Rektor həmçinin Prezident İlham Əliyevin apardığı düşünülmüş siyasətin Azərbaycanın işıqlı gələcəyi üçün böyükperspektivlər vəd etdiyini bildirmişdir. Rektor çıxışında Akademiyanın tələbə və müdavimlərinə Ümummilli Liderimizin dövlət quruculuğu, dövlət idarəçiliyi sahəsindəki zəngin təcrübəsinin öyrənilməsi istiqamətində tövsiyələr də vermişdir.
Xarici işlər nazirinin müavini, Azərbaycan Diplomatiya Universitetinin rektoru, prof. Hafiz Paşayev çox maraqlı və ətraflı çıxışında Azərbaycanın əldə etdiyi bütün nailiyyətlərin Ulu Öndər Heydər Əliyevin müdrik, uzaqgörən siyasəti, bacarıqlı təşkilatçılıq, idarəçilik qabiliyyəti nəticəsində mümkünlüyündən söz açmış, dövlətçiliyimizin çətin şəraitdə qurularaq möhkəmlənməsində, sabitliyin saxlanılmasında, ölkənin ağır vəziyyətdən çıxarılmasında, Azərbaycanın xarici dövlətlərlə, xüsusilə də ABŞ-la münasibətlərinin qurulması və inkişaf etdirilməsində Ümummilli Liderin rolunu qeyd etmişdir. Natiq Ulu Öndərin diqqət və qayğısı ilə yaradılmış Dövlət İdarəçilik Akademiyasında dövlət idarəçiliyi üçün layiqli kadrlar hazırlandığına əmin olduğunu bildirmişdir.
Tədbirdə səslənən çıxışlarda mövzu ilə əlaqədar fikirlər söylənilmiş, Ümummilli Lider Heydər Əliyevin siyasətinin Azərbaycan üçün nə demək olduğunu, bu siyasətin ölkənin gələcəyi üçün zəruriliyi vurğulanmışdır.

DİA-nın Mətbuat və İnformasiya Xidməti