Azərbaycan Respublikasının Prezidenti yanında Dövlət İdarəçilik Akademiyası

Dövlət İdarəçilik Akademiyasının Diskussiya Klubu “Qlobal iqlim dəyişikliyi: real vəziyyət və gələcəyin görünüşü” mövzusunda elmi-maarifləndirici seminar keçirmişdir

Dekabrın 19-da Azərbaycan Respublikasının Prezidenti yanında Dövlət İdarəçilik Akademiyasında həmin Akademiyanın Diskussiya Klubu tərəfindən təşkil olunan “Qlobal iqlim dəyişikliyi: real vəziyyət və gələcəyin görünüşü” mövzusunda elmi-maarifləndirici seminar keçirilmişdir. Seminarda Akademiyanın Həmkarlar Komitəsinin sədri Yusif Ağayev, ADNA-nın dosenti Fuad Məmmədov, AMEA-nın Torpaqşünaslıq İnstitunun dissertantı Ülviyyə Səmədova və Diskussiya Klubunun üzvləri iştirak etmişdir.
Tədbiri giriş sözü ilə açan Diskussiya Klubunun sədri Tamerlan Dəmirbəyli tədbir iştirakçıları adından seminarın keçirilməsinə verdiyi dəstəyə görə Dövlət İdarəçilik Akademiyasının rektoru professor Seyfəddin Qəndilova dərin minnətdarlığını bildirmişdir. Qlobal iqlim dəyişikliyinin səbəbləri və göstərə biləcəyi neqativ təsirləri tələbələrin nəzərinə çatdıran Tamerlan Dəmirbəyli ekoloji siyasətlə bağlı olan belə seminarın, məhz, Dövlət İdarəçilik Akademiyasında keçirilməsinin təsadüfi olmadığını vurğulamışdır.
Daha sonra, dos. Fuad Məmmədovun “Alternativ energetika: qlobal iqlim dəyişikliyinə qarşı ən effektiv mübarizə üsulu kimi” mövzusunda interaktiv məruzəsi dinlənilmişdir. İnteraktiv mühazirədə Azərbaycan günəş energetikasının tətbiqi perspektivləri haqqında geniş söhbət açılmışdır.
Tədbirdə, həmçinin, AMEA-nın Torpaqşünaslıq İnstitunun dissertantı Ülviyyə Səmədova “Azərbaycanda qlobal iqlim dəyişikliyinin göstərə biləcəyi neqativ təsirlər” mövzusunda çıxış etmişdir.
Seminarda Akademiyanın Həmkarlar Komitəsinin sədri dos. Yusif Ağayev Diskussiya Klubunun noyabr ayında keçirilən “Səmərəli dövlət idarəçiliyi: üsul və texnologiyalar” adlı seminarında fəal iştirakına görə 127-ci qrup tələbəsi Gültəkin Bayramovanı diplomla təltif etmiş və YUNESKO Mərkəzinin hədiyyə etdiyi dəyərli kitabları ona təqdim etmişdir.
Daha sonra tədbirdə 163-cü qrup tələbəsi Elvin Məmmədli “Azərbaycanda ekoloji siyasət” və 129-cu qrup tələbəsi Nərmin Miri “Beynəlxalq münasibətlərdə qlobal iqlim dəyişikliyi” mövzusunda çıxış etmişlər.
Tədbirin sonunda seminarın qərarı tədbir iştiraklarının müzakirəsinə verilmiş və qəbul olunmuşdur.
Sonda tələbələr iqlim dəyişikliyi barədə hazırlanmış test nümunələrini cavablandırmışlar.