Dövlət İdarəçilik Akademiyasında "Dövlət siyasəti sahəsində beynəlxalq bilik standartlarının tətbiqi (PPKN)" saytının təqdimat mərasimi

Dekabrın 26-da Dövlət İdarəçilik Akademiyasında Kanada Beynəlxalq İnkişaf Agentliyi və onun ixtisaslaşmış qurumu olan Kanada Beynəlxalq Təhsil Bürosu, eləcə də DİA-nın birgə həyata keçirdikləri “Dövlət siyasəti sahəsində beynəlxalq bilik standartlarının tətbiqi (PPKN)” saytının təqdimat mərasimi keçirilmişdir.
Tədbiri akademiyanın rektoru, əməkdar elm xadimi, professor Seyfəddin Qəndilov açaraq, layihə barədə məlumat vermiş, birgə əməkdaşlığın növbəti mərhələsi olan saytın açılmasının çox vacib olduğunu bildirmişdir. Rektor bir neçə il ərzində əməkdaşlığı nəzərdə tutulan bu layihənin dövlət idarəçiliyi sahəsində beynəlxalq bilik standartlarının tətbiqini elmi-informasiya cəhətdən təmin etməli olan internet portalının yaranmasını respublikamızın təhsil sistemində, eləcə də dövlət idarəçiliyi təcrübəsində diqqətəlayiq bir hadisə olduğunu qeyd etmişdir.
Yeni sayt bir neçə bölmədən - dövlət siyasətinin təhlili, iqtisadi təhlili, dövlət siyasətinin gender təhlili, elektron hökumət, dövlət qulluğu etikası və digər mövzular üzrə bölmələrdən ibarətdir. Hər bölmədə bu istiqamətlər üzrə mövcud materiallar, məqalələr, kitab və ensiklopedik materiallar toplanmışdır. Bununla yanaşı, layihə çərçivəsində respublikamızda ilk dəfə olaraq Azərbaycan dilində 3 istiqamət üzrə DİA-nın müəllimləri tərəfindən hazırlanmış dərs vəsaitləri və ingilis dilindən Azərbaycan dilinə tərcümə edilmiş bir neçə kitab yerləşdirilmişdir.
Saytın strukturunda bir sıra xüsusiyyətlər mövcuddur. Belə ki, sayta materiallar yerləşdirmək imkanı olan şəbəkə üzvləri ilə yanaşı, istənilən internet istifadəçisi burada yerləşdirilmiş materiallardan istifadə edə bilər.
Saytda həmçinin müntəzəm olaraq Azərbaycanla bağlı yeniliklər və maraqlı məlumatlar yerləşdirilir. Saytın daha da dolğun olması istiqamətində işlər davam etdirilir.

Foto

DIA-nın Mətbuat və İnformasiya Xidməti