Qarabağla bağlı saytın təqdimat mərasimi keçirildi

Dünən Prezidenti yanında Dövlət İdarəçilik Akademiyasının (DİA) hazırladığı http://www.garabagh.ws/ saytının təqdimat mərasimi keçirilib. DİA-nın rektoru Seyfəddin Qəndilov bildirib ki, sayt akademiyanın UNESCO Mərkəzi ilə “Dostluq” Gənclərin Əlaqələndirmə Mərkəzinin birgə fəaliyyəti, QHT-lərə Dövlət Dəstəyi Şurasının maliyyə dəstəyi ilə hazırlanıb. Onun sözlərinə görə, 121 bölmədən ibarət saytda Qarabağın təbiəti, iqlimi, müxtəlif vaxtlarda yaşamış görkəmli şəxsiyyətlər barədə məlumatlar, çoxlu şəkillər yerləşdirilib.
      Milli Məclisin sədr müavini Bahar Muradova bildirib ki, Qarabağla bağlı ədalətsizlik bu gün də davam edir və həqiqətlərin dünyaya çatdırılması üçün hər kəsin üzərinə vəzifələr düşür: “Çox vaxt rəsmi fəaliyyətdən daha çox fərdi və ictimai fəaliyyət dünya arenasında əks-səda doğura bilir. Biz dünyanın müxtəlif qurumlarının rəhbərləri ilə görüşürük, onların diqqətini problemə yönəldirik. Qarabağla bağlı xeyli saytlar yaradılıb və müəyyən işlər görülüb. Amma bu, kifayət deyil. Problem həll olunmayana qədər bu proses davam etməlidir”.
      QHT-lərə Dövlət Dəstəyi Şurasının sədri Azay Quliyevin fikrincə, Azərbaycanla Ermənistan arasındakı informasiya savaşında yeni mərhələ başlanılıb. O, buna görə də qarşıda daha böyük vəzifələr dayandığını və saytın üzərinə ağır məsuliyyət düşdüyünü bildirib: “Saytda dövlətin Qarabağla bağlı həyata keçirdiyi siyasət də öz əksini tapmalıdır. Ermənilərin Qarabağa dair yaydığı informasiyalar sayt əməkdaşları tərəfindən daim diqqətdə saxlanmalı və onların məkrli təbliğat materiallarının qarşısı alınmalıdır”.
      Tədbirin sonunda yeni internet resursu iştirakçılara təqdim olunub.

Foto

DIA-nın Mətbuat və İnformasiya Xidməti