Dövlət İdarəçilik Akademiyasında Yeni dərs ili

Yeni dərs ilinin başlanması ilə əlaqədar Azərbaycan Respublikasının Prezidenti yanında Dövlət İdarəçilik Akademiyasında tədbir keçirilmişdir.
Tədbiri Akademiyanın rektoru, əməkdar elm xadimi, professor Seyfəddin Qəndilov giriş sözü ilə açaraq tələbələri, müəllimləri və eləcə də bütün kollektiv üzvlərini Yeni dərs ilinin başlanması və Bilik günü münasibətilə təbrik etdi, onlara təhsildə və işlərində yeni-yeni uğurlar arzuladı. Rektor Ümummilli Lider Heydər Əliyevin diqqət və qayğısı ilə yaradılmış və bu günlərdə 10 yaşı tamam olan Dövlət İdarəçilik Akademiyasının son illərdə əldə etdiyi nailiyyətlərdən söhbət açmış, bu təhsil ocağının respublikamız üçün idarəçilik sahəsində mütəxəssislər hazırlanması işində önəmli rolu olduğunu vurğulamışdır. Ulu Öndər Heydər Əliyevin elmə, təhsilə göstərdiyi qayğı və diqqətin bu gün ölkə Prezidenti cənab İlham Əliyev tərəfindən uğurla davam etdirilməsini diqqətə çatdıran rektor ümid etdiyini bildirmişdir ki, DİA-nın ənənələrinə sadiq qalan tələbələr öz biliyi, bacarığı ilə idarəçilik sahəsində öz töhfələrini verəcəkdir.
“Fəlsəfə” kafedrasının müdiri, professor Tofiq Rəsulov, “Dillər” kafedrasının müdiri, professor Akif Bayramov yeni dərs ilinin başlanması münasibətilə müəllimləri və tələbələri təbrik edərək onlara təhsildə uğurlar arzuladılar. Qəbul imtahanında 700 bal toplamış I kurs tələbəsi Musayeva Fəridə öz çıxışında nüfuzlu ali məktəb olan Dövlət İdarəçilik Akademiyasına daxil olmasını həyatının ən sevincli, unudulmaz anı olduğunu qeyd edərək Prezident yanında olan bu təhsil ocağına qəbul edilməsindən böyük qürur duyduğunu bildirdi.
Valideynlərdən Əliyev Bürhan çıxış edərək övladının İdarəçilik Akademiyasına qəbul olunması ilə fəxr etdiyini vurğulayaraq tələbələrin təhsil almaları üçün hərtərəfli şərait yaratmış Akademiya rəhbərlyiinə öz minnətdarlığını bildirmişdir. İlk təhsil günü tələbələrin Akademiya ılə tanışlığı ilə sona çatdı.

Foto

DIA-nın Mətbuat və İnformasiya Xidməti