DÖVLƏT İDARƏÇİLİK AKADEMİYASINDA MƏZUN GÜNÜ

İyunun 30-da Azərbaycan Respublikasının Prezidenti yanında Dövlət İdarəçilik Akademiyasında məzun günü keçirilmişdir.
Tədbir dövlət himni ilə başlamışdır.
Tədbiri giriş sözü ilə Akademiyanın rektoru, əməkdar elm xadimi, professor Seyfəddin Qəndilov açaraq müəllimləri, valideynləri və məzunları təbrik edərək onlara gələcək fəaliyyətlərində uğurlar arzulamışdır. Rektor Prezident İlham Əliyevin respublikada elm və təhsilin inkişafına, habelə Azərbaycan təhsilinin dünya təhsil sisteminə inteqrasiya olunmasından danışmışdır. Akademiyanın müəllim, professor heyəti qarşısında duran başlıca vəzifə gənclərə dərin bilik vermək, tələbələri dövlətə və dövlətçiliyə sədaqət ruhunda tərbiyə etməkdirsə, onların da ən vacib vəzifəsi elmin sirlərinə dərindən yiyələnməkdir.
Tədbirdə Akademiyada fərqlənən məzunlara fəxri fərmanlar təqdim edilmişdir.
“Dillər” kafedrasının müdiri, prof. Akif Bayramov, “İqtisadiyyatın dövlət tənzimlənməsi” kafedrasının müdiri, dos. Roza Əliyeva çıxış edərək məzunları ürəkdən təbrik etmiş, onlara gələcək həyatlarında uğurlar arzulamışlar.
Məzunlardan Siyasi idarəetmə fakültəsinin məzunu Camalzadə Murad, İnzibati idarəetmə fakültəsinin məzunu Fatimə Əliyeva çıxış edərək Akademiyada aldıqları təhsilin gələcəkdəki fəaliyyətlərində böyük rolu olacağını, eləcə də professor və müəllim heyətinə dərindən təşəkkürlərini bildirmişlər. Doğma Vətənə və xalqımıza daim ləyaqətlə xidmət edəcəklərinə söz vermişlər.
Sonda respublikanın tanınmış incəsənət ustalarının ifasında bədii hissə başlamışdır.

Foto

DIA-nın Mətbuat və İnformasiya Xidməti