DÖVLƏT İDARƏÇİLİK AKADEMİYASINDA DƏYİRMİ MASA KEÇİRİLMİŞDİR

Mayın 14-də Azərbaycan Respublikasının Prezidenti yanında Dövlət İdarəçilik Akademiyasında “Lider qadınlar” və “Demokratik İnkişaf İnstitutu” ictimai birliklərinin təşkilatçılığı ilə “Ailə və nigah münasibətlərində qadın hüquqları” mövzusunda dəyirmi masa keçirilmişdir.
Tədbiri Akademiyanın rektoru, əməkdar elm xadimi, professor Seyfəddin Qəndilov açaraq tədbir iştirakçılarını salamlamış, mövzu ətrafında geniş məlumat verərək bu gün çox aktual olan ailə problemlərindən, Azərbaycanda ailə hüququnun tənzimlənməsindən, xüsusilə də qadın hüquq və azadlıqlarının təmin edilməsi barədə ətraflı məlumat vermişdir. Rektor 1999-cu ildə Milli Məclisdə Ailə Məcəlləsinin qəbul olunmasını bir daha yada salmış, ailə-nigah münasibətlərinin Azərbaycan cəmiyyəti üçün çox aktual olduğunu vurğulayaraq bu tədbirin keçirilməsini məqsədəuyğun saymışdır.
            “Lider qadınlar” İctimai Birliyinin sədri, millət vəkili Məlahət Ibrahimqızı 15 mayın dünyada Beynəlxalq Ailə günü kimi qeyd olunduğunu diqqətə çatdırmış və bu münasibətlə tədbir iştirakçılarını təbrik etmişdir.
Tədbirin digər təşkilatçısı – “Demokratik İnkişaf İnstitutu” İctimai Birliyinin sədri, Milli Məclisin Beynəlxalq Münasibətlər və Parlamentlərarası Əlaqələr Komitəsinin sədr müavini Gültəkin Hacıbəyli tədbirin Azərbaycan cəmiyyəti və dövləti üçün çox mühüm əhəmiyyət kəsb edən bir məsələyə həsr olunduğunu söyləmişdir.
Sonda yekun olaraq Dövlət İdarəçilik Akademiyasının rektoru, professor Seyfəddin Qəndilov tədbirin əhəmiyyətini, vacibliyini bir daha iştirakçıların diqqətinə çatdırmış və onlara öz dərin təşəkkürünü bildirmişdir.

Foto

DIA-nın Mətbuat və İnformasiya Xidməti