Dövlət İdarəçilik Akademiyasında qısamüddətli ixtisasartırma kursunun növbəti buraxılışı

Azərbaycan Respublikasının Prezidenti yanında Dövlət İdarəçilik Akademiyasında aprel ayının 27-dən may ayının 02-dək “Yerli özünüidarəetmə və bələdiyyə idarəçiliyinin əsasları” istiqaməti üzrə keçirilən ixtisasartırma kurslarının növbəti buraxılışı olmuşdur.
Şəhər və qəsəbə bələdiyyələrinin sədrləri, sədr müavinləri və üzvlərinin iştirak etdiyi kursun əsas məqsədi yerli özünüidarəetmə və bələdiyyə idarəçiliyi sahəsində dinləyicilərin biliklərinin təkmilləşdirilməsi, onlara yeni məlumatların verilməsi problemlər ətrafında geniş müzakirə və fikir mübadiləsinin aparılması olmuşdur.
Tədris-tematik plan üzrə kursda yerli özünüidaretmənin hüquqi əsasları, onun iqtisadi və maliyyə problemləri, bu sahədə beynəlxalq təcrübənin öyrənilməsi, yerli özünüidarəetmənin başlıca inkişaf meylləri, bələdiyyələrdə torpaq münasibətləri və s. mövzular üzrə mühazirə və dəyirmi masa keçirilmişdir.
Təhsil müddəti ərzində kursda Azərbaycan Respublikası Prezidenti Administrasiyasının Regional idarəetmə və yerli özünüidarəetmə orqanları ilə iş şöbəsinin sektor müdiri Ramiq Həşimov, Milli Məclisin Regional məsələlər komitəsinin sədri Arif Rəhimzadə, Sosial siyasət komitəsinin sədri Hadi Rəcəbli, Ədliyyə Nazirliyinin Bələdiyyələrlə İş Mərkəzinin rəisi Mehdi Səlimzadə, Dövlət Torpaq və Xəritəçəkmə Komitəsinin sektor müdiri Lətif Qasımov, MSK-nın üzvü Tofiq Həsənov, tanınmış alim mütəxəssisləri dinləyicilər qarşısında yerli özünüidarəetmənin müxtəlif problemlərinə dair mühazirələrlə çıxış etmişlər.
May ayının 02-də Azərbaycan Respublikasının Prezidenti yanında Dövlət İdarəçilik Akademiyasında həmin istiqamət üzrə dinləyicilərin buraxılış mərasimi keçirilmişdir. DİA-nın rektoru, əməkdar elm xadimi, prof. S.T.Qəndilov kursun sonunda dinləyicilər qarşısında çıxış edərək kursun dinləyicilərinə vəsiqələr təqdim etmiş və gələcək işlərində uğurlar arzu etmişdir.  

Foto

DIA-nın Mətbuat və İnformasiya Xidməti