17 aprel 2009-cu il tarixində Azərbaycan Respublikasının Prezidenti yanında Dövlət İdarəçilik Akademiyası Tələbə Elmi Cəmiyyətinin “Azərbaycan Respublikası demokratik inkişaf yolunda: nailiyyətlər və perspektivlər” mövzusunda illik yekun elmi konfrans keçirilmişdir.
Tələbə, magistrant və müdavimlərin geniş cəlb olunduğu elmi konfransın plenar iclasını Akademiyanın rektoru, tarix elmləri doktoru, professor, əməkdar elm xadimi Seyfəddin Qəndilov açaraq respublikamızın Ümummilli Lideri Heydər Əliyevin böyük müdrikliklə müəyyənləşdirdiyi milli inkişaf modeli üzrə onun strateji inkişaf kursunu böyük ustalıq və bacarıqla həyata keçirən Azərbaycan Respublikasının Prezidenti cənab İlham Əliyevin rəhbərliyi altında demokratiya və azad bazar iqtisadiyyatı prinsiplərini özündə ehtiva edən ümumbəşəri yolla uğurla irəlilədiyini, bu gün Azərbaycanın regionun lider dövləti olmaqla dünya birliyində özünə layiqli yer tutduğunu göstərmiş, dövlətimizin elmə, təhsilə diqqət göstərdiyini, gənclərimizin hərtərəfli inkişafına, onların milli-mənəvi dəyərlərimiz və vətənpərvərlik ruhunda tərbiyə olunmasına böyük qayğı ilə yanaşdığını, bu baxımdan gənclərimizin demokratik düşüncə tərzinin inkişafının böyük əhəmiyyət daşıdığını vurğulamışdır.
Rektor ölkəmizdə hökm sürən davamlı ictimai-siyasi sabitlik şəraitində müvəffəqiyyətlə aparılan demokratik, hüquqi dövlət quruculuğu sahəsində əldə olunan nailiyyətlər və perspektivlər barədə geniş söhbət açaraq, bu təcrübənin elmi əsaslar üzərində tədqiqinin böyük əhəmiyyət kəsb etdiyini və bu baxımdan Tələbə Elmi Cəmiyyətinin elmi konfransının çox vacib bir problemə həsr olunduğunu bildirmişdir.
Sonra natiq Akademiyanın Tələbə Elmi Cəmiyyətinin işinə toxunaraq, onun 2001-ci ildən fəaliyyət göstərdiyini qeyd etmiş, bu illər ərzində tələbə, magistrant və müdavimlərin elmi yaradıcılığa olan maraqlarının inkişaf etdirilməsi sahəsindəki uğurlarından, bundan sonra TEC qarşısında duran vəzifələrdən ətraflı danışmış və konfransın işinə uğurlar arzulamışdır.
Elmi konfransda DİA Tələbə Elmi Cəmiyyətinin sədri, dosent Sevil Məmmədova müzakirə olunan mövzu ilə bağlı məruzə etmiş, məruzə ətrafında çıxışlarda müdavim Rafiq Əzizov, tələbələrdən “İnzibati idarəetmə” fakültəsinin IV kurs tələbəsi, prezident təqaüdçüsü Rafimə Əliyeva və “Siyasi idarəetmə” fakültəsinin IV kurs tələbəsi Jalə Axundova iştirak etmişlər.
Sonra konfrans öz işini üç bölmədə davam etdirmişdir.
Foto
DIA-nın Mətbuat və İnformasiya Xidməti |
Dövlət