 Martın 6-da Azərbaycan Respublikasının Prezidenti yanında Dövlət İdarəçilik Akademiyasında 8 mart - Beynəlxalq Qadınlar gününə həsr olunmuş yığıncaq keçirilmişdir.
Yığıncağı Akademiyanın rektoru, əməkdar elm xadimi, professor Seyfəddin Qəndilov açaraq, qadınların cəmiyyətdə rolunu qeyd etmiş, ölkəmizdə qadınlar üçün yaradılmış imkanlardan, onların hüquqlarının qorunması, rəhbər vəzifələrə irəli çəkilməsi istiqamətində aparılan işlərdən danışmış, qadınların istər ana, istər ictimaiyyətçi, istər alim, istər müəllim, bir sözlə bütün sahələrdə fəallıq göstərmələrinin təqdirəlayiq hal olduğunu bildirmişdir.
Rektor Azərbaycan qadınlığının ən gözəl bir nümunəsi kimi, YUNESKO və İSESKO-nun xoşməramlı səfiri, millət vəkili, Heydər Əliyev Fondunun Prezidenti Mehriban xanım Əliyevanı xeyirxahlıq, humanizm, mərhəmət, sadəlik və insanpərvərlik simvolu kimi dəyərləndirmişdir. Onun sözlərinə görə, ölkənin birinci xanımının təşəbbüsü və yaxından köməkliyi ilə respublikamızda yeni məktəb, xəstəxana tikintisi geniş vüsət almışdır. Xalq musiqimizin misilsiz sərvəti olan muğamlarımızın dünyada təbliğində, milli-mənəvi dəyərlərimizin qorunub-saxlanılması və inkişaf etdirilməsində Azərbaycan Mədəniyyətinin Dostları fondunun, Gimnastika Federasiyasının rəhbəri kimi Mehriban xanımın məqsədyönlü fəaliyyətinin ictimaiyyət tərəfindən yüksək qiymətləndirilməsini qeyd etmişdir.
Təsadüfi deyildir ki, respublikamızda 100-ə yaxın qadın təşkilatı Azərbaycan qadınına xas olan yüksək keyfiyyətləri özündə cəmləşdirən, xeyriyyəçilik fəaliyyətini gündən-günə genişləndirən Mehriban xanımı özlərinin vahid lideri seçmişlər.
Sonda rektor Akademiyada çalışan qadınların fəaliyyətindən, tədris prosesindəki nailiyyətlərindən söz açaraq, onları bayram münasibətilə təbrik etmiş və bütün sahələrdə uğurlar arzulamışdır.
Bayram tədbirində tələbələrin və peşəkar müğənnilərin ifasında ana və qadınlara həsr olunmuş şeirlər və mahnılar səsləndirilmişdir.
Foto
DIA-nın Mətbuat və İnformasiya Xidməti |
Dövlət