Azərbaycan Respublikasının Prezidenti yanında Dövlət İdarəçilik Akademiyasında qısamüddətli ixtisasartırma kursunun növbəti buraxılışı

Azərbaycan Respublikasının Prezidenti yanında Dövlət İdarəçilik Akademiyasında 2009-cu il yanvar ayının 26-dan fevral ayının 7-nə qədər tarixdə “Yerli özünüidarəetmə və bələdiyyə idarəçiliyinin əsasları” istiqaməti üzrə keçirilən ixtisasartırma kursunun növbəti buraxılışı olmuşdur.
Şəhər və rayon bələdiyyələrinin sədrləri, sədr müavinləri və üzvləri iştirak etdiyi bu kursun əsas məqsədi yerli özünüidarəetmə və bələdiyyə idarəçiliyi sahəsində dinləyicilərin biliklərinin təkmilləşdirilməsi, yeni məlumatların verilməsi və fikir mübadiləsinin aparılması olmuşdur.
Tədris-tematik plan üzrə kursda yerli özünüidarəetmənin hüquqi əsasları, onun iqtisadi və maliyyə problemləri, bu sahədə beynəlxalq təcrübənin öyrənilməsi , heyətin idarə olunmasının əsas prinsipləri, yerli özünüidarəetmə orqanlarında sənədləşdirmə texnologiyası və s.mövzular üzrə mühazirələr aparılmışdır.
Təhsil müddəti ərzində kursda Azərbaycan Respublikası Prezidentinin İcra Aparatının Ərazi orqanları ilə iş şöbəsinin sektor müdiri Ramiq Həşimov, Azərbaycan Respublikası Prezidentinin İcra Aparatının Sənədlərlə və vətəndaşların müraciəti ilə iş şöbəsinin müdir müavini Fikrət Əzizov, Milli Məclisin Regional Məsələlər üzrə Daimi Komissiyasının sədri Arif Rəhimzadə, Sosial Siyasət Daimi Komissiyasının sədri Hadi Rəcəbli, Milli Məclisin hüquq siyasəti və dövlət quruculuğu məsələləri Daimi Komissiyasının sədri Əli Hüseynov, Ədliyyə Nazirliyinin Bələdiyyələrlə İş Mərkəzinin rəisi Mehdi Səlimzadə, Dövlət Torpaq və Xəritəçəkmə Komitəsinin sektor müavini Lətif Qasımov, Azərbaycan Qəsəbə Bələdiyyələrinin Milli Assosiasiyasının sədr müavini Tofiq Həsənov, tanınmış alim-mütəxəssisləri dinləyicilər qarşısında yerli özünüidarəetmənin müxtəlif problemlərinə dair mühazirələrlə çıxış etmişlər.
Kursun dinləyiciləri bu tədris gününü Abşeron rayon Qobu bələdiyyəsinin iş təcrübəsi ilə tanış olaraq praktika keçmişlər. Əlavə olaraq bir tədris gününü də Ədliyyə Nazirliyinin Bələdiyyələrlə iş Mərkəzində olaraq Mərkəzin əməkdaşları ilə fikir mübadiləsi aparmışlar.
Fevral ayının 7-də Azərbaycan Respublikasının Prezidenti yanında Dövlət İdarəçilik Akademiyasında həmin istiqamət üzrə dinləyicilərin buraxılış mərasimi keçirilmişdir. DİA-nın rektoru, əməkdar elm xadimi, prof. S.T.Qəndilov kursun sonunda dinləyicilər qarşısında çıxış edərək kursun dinləyicilərinə vəsiqələr təqdim edərək gələcək işlərində uğurlar arzu etmişdir.

DIA-nın Mətbuat və İnformasiya Xidməti