 Yanvarın 19-da Dövlət İdarəçilik Akademiyasında 20 yanvar şəhidlərinin xatirəsinə həsr olunmuş anım mərasimi keçirilmişdir.
Yığıncaq başlamazdan əvvəl şəhidlərin əziz xatirəsi bir dəqiqəlik sükutla yad edilmişdir.
Mərasimi Akademiyanın rektoru, əməkdar elm xadimi, prof. Seyfəddin Qəndilov açaraq 1990-cı ilin qanlı yanvar günlərinin baş vermə səbəblərini xatırlamış, sovet imperiyasının törətdiyi bu qanlı cinayət aksiyasını xalqımızın milli azadlıq hərəkatını boğmağa, ərazi bütövlüyümüzün qorunması naminə haqq səsimizi susdurmağa çalışan siyasətin acı nəticəsi olduğunu qeyd etmiş, bu gün də bu hadisələrin unudulmadığını, günahsız insanların əziz xatirələrinin xalqımızın qəlbində hər zaman yaşadığını bildirmişdir. Rektor 1988-ci ildə respublikamızda baş v ermiş məlum hadisələrin davamı olan və böyük fəlakətlə nəticələnən bu faciənin tariximizə qanlı yanvar hadisəsi kimi daxil olduğunu, həmin dövrdə Moskvada yaşayan xalqımızın böyük oğlu, görkəmli siyasi xadim, Ümummilli liderimiz Heydər Əliyevin öz haqq səsini ucaldaraq başımıza gətirilən müsibətlərin dünya ictimaiyyətinə çatdırılması üçün göstərdiyi səylərdən danışmış, o günlərdə onun Azərbaycan daimi nümayəndəliyinə gələrək keçirdiyi mətbuat konfransının böyük əhəmiyyətini qeyd etmişdir. Rektor Heydər Əliyevin ölkə rəhbərliyinə yenidən qayıdışından sonra bu istiqamətdə görülən işlərdən, onun təşəbbüsü ilə ilk dəf ə bu hadisəyə hüquqi-siyasi qiymət verildiyindən danışmış, şəhidlərin xatirəsinin əbədiləşdirilməsi, onların ailə üzvlərinə kömək üçün imzaladığı sənədlərin bu insanların xatirəsinə böyük ehtiram olduğunu bildirmişdir.
Geostrateji Araşdırmalar Mərkəzinin direktor müavini Elman Nəsirov, müdavim I kurs tələbəsi Əliyev Elnur 1988-1990-cı illərdə baş vermiş hadisələr zəminində qanlı yanvar hadisələri ilə başa çatan bu faciə barədə fikirlərini bildirmiş, bir daha həmin hadisələri xatırlatmışlar.
Sonra incəsənət xadimləri Ağalar Bayramov və Azad Şükürovun, eləcə də Akademiyanın tələbələrinin ifasında şəhidlərin xatirəsinə həsr olunmuş ədəbi-bədii kompozisiya səsləndirilmişdir.
DIA-nın Mətbuat və İnformasiya Xidməti
|
Dövlət