Dövlət İdarəçilik Akademiyasında qısamüddətli ixtisasartırma kursunun növbəti buraxılışı

Azərbaycan Respublikasının Prezidenti yanında Dövlət İdarəçilik Akademiyasında qısamüddətli ixtisasartırma kursunun növbəti buraxılışı başa çatmışdır.
“Dövlətin sosial siyasəti: mahiyyət, priorotetlər və həyata keçirilmə mexanizmləri” proqramı üzrə kurslarda icra hakimiyyəti orqanlarının, müvafiq nazirlik, komitə və idarələrin rəhbər işçiləri iştirak etmişlər.
Bu sahədə tədrisin əsas məqsədi sosial islahatlar şəraitində sosial siyasətin hazırlanması və həyata keçirilməsi sahəsində biliklərin sistemləşdirilməsi, dinləyicilərə bu sahədə yeni informasiyaların verilməsidir.
Tədris-tematik plan üzrə kursda dövlətin sosial siyasətinin mahiyyəti və başlıca vızifələri, əsas priotitetləri və istiqamətləri, sosial proqramların formalaşması metodikası, sosial sahənin təşkilatı-idarəetmə və maliyyə təminatı və digər mövzularda mühazirələr oxunmuşdur və müzakirələr aparılmışdır.
Təhsil müddəti ərzində dinləyicilər Əmək və Əhalinin Sosial Müdafiəsi Nazirliyinin Regional Peşə Tədris Mərkəzində təcrübə keçərək Dövlətin məşğulluq siyasətinin həyata keçirilməsinin praktik məsələləri ilə tanış olmuşlar.
Kursda Əmək və Əhalinin Sosial Müdafiəsi Nazirinin müavini İlqar Rəhimov, Azərbaycan Respublikası Prezidentinin İcra Aparatının İctimai-siyasi şöbəsinin sektor müdiri Tahir Süleymanov, Azərbaycan Respublikası Milli Məclisinin Sosial siyasət daimi komissiyasının sədri Hadi Rəcəbli və sədr müavini Musa Quliyev, Milli Məclis Aparatının sosial qanunvericilik şöbəsinin müdiri Ədilə Abbasova, Dövlət Sosial Müdafiə Fondunun, Qaçqın və Məcburi Köçkünlərlə iş üzrə Dövlət Komitəsinin, Səhiyyə Nazirliyinin məsul işçiləri və digər tanınmış alim-mütəxəssislər dinləyicilər qarşısında sosial siyasətin müasir problemlərinə dair müxtəlif mövzularda mühazirələrlə çıxış etmişlər.
Dekabr ayının 6-da Azərbaycan Respublikasının Prezidenti yanında Dövlət İdarəçilik Akademiyasında həmin istiqamət üzrə dinləyicilərin buraxılış mərasimi keçirilmişdir. DİA-nın rektoru, əməkdar elm xadimi, prof. S.T.Qəndilov kursun sonunda dinləyicilər qarşısında çıxış etmiş və gələcək işlərində uğurlar arzu etmişdir.

DIA-nın Mətbuat və İnformasiya Xidməti