Yanvarın 19-da Azərbaycan Respublikasının Prezidenti yanında Dövlət İdarəçilik Akademiyasında 20 yanvar faciəsinin iyirmi ikinci ildönümünə həsr olunmuş anım tədbiri keçirilmişdir.
Tədbir başlanmazdan əvvəl şəhidlərin əziz xatirəsi bir dəqiqəlik sükutla yad edilmiş, daha sonra faciəni əks etdirən video slaydı nümayiş etdirilmişdir.
Tədbiri Akademiyanın rektoru, akademik Urxan Ələkbərov açaraq, 1990-cı ilin qanlı yanvar günlərini xatırlatmış, sovet imperiyasının törətdiyi bu qanlı cinayət aksiyasını xalqımızın milli azadlıq hərəkatını boğmağa, ərazi bütövlüyümüzün qorunması naminə haqq səsimizi susdurmağa çalışan siyasətin acı nəticəsi olduğunu qeyd etmişdir. Rektor bu hadisələrin unudulmadığını, günahsız insanların əziz xatirəsinin, xalqımızın qəlbində hər zaman yaşayacağını bildirmişdir. 1988-ci ildə respublikamızda baş vermiş məlum hadisələrin davamı olan və böyük fəlakətlə nəticələnən bu faciənin tariximizə qanlı yanvar hadisələri kimi daxil olmağından həmin dövrdə Moskvada yaşayan xalqımızın böyük oğlu, görkəmli siyasi xadim, Ümummilli Lider Heydər Əliyevin öz haqq səsini ucaldaraq faciənin dünya ictimaiyyətinə çatdırılması üçün göstərdiyi səylərdən, o günlərdə onun Azərbaycanın Moskvadakı daimi nümayəndəliyinə gələrək keçirdiyi mətbuat konfransının əhəmiyyətindən danışmışdır. Rektor Heydər Əliyevin ölkə rəhbərliyinə yenidən qayıdışından sonra bu istiqamətdə gördüyü işlərdən, onun təşəbbüsü ilə ilk dəfə bu hadisəyə hüquqi-siyasi qiymət verildiyindən danışmış, şəhidlərin xatirəsinin əbədiləşdirilməsi, onların ailə üzvlərinə kömək üçün ulu öndərin imzaladığı sənədlərin bu insanların xatirəsinə böyük ehtiram olduğunu bildirmişdir.
Tədbirdə çıxış edən natiqlər zaman keçdikcə biz tariximizin həm şanlı səhifələrini, uğurlu səhifələrini, həm də faciəli səhifələrini yad etməliyik, nəsillərdən-nəsillərə verməliyik. Bunların içərisində 20 Yanvar faciəsi, eyni zamanda o günlər göstərilən qəhrəmanlıq, şücaət və xalqın birliyi hamıya örnək olmalıdır – bu gün yaşayanlara da, gələcək nəsillərə də. Hamı bu hadisədən ibrət dərsi götürməlidir kimi fikirlər ifadə etmişlər.
Foto
DİA-nın Mətbuat və İnformasiya Xidməti
|
Dövlət