Dövlət İdarəçilik Akademiyasında dəyirmi masa keçirilmişdir

13 dekabr 2012-ci il tarixində Azərbaycan Respublikasının Prezidenti yanında Dövlət İdarəçilik Akademiyasında Azərbaycan Respublikasının Prezidenti cənab İlham Əliyevin təşəbbüsü əsasında qəbul edilmiş “Azərbaycan 2020: gələcəyə baxış” İnkişaf Konsepsiyasının hazırlanması barədə sərəncamdan irəli gələn məsələlərin icrası ilə əlaqədar ölkəmizin gələcək inkişafının əsaslarını müəyyənləşdirəcək strategiyanın həyata keçirilməsində elmi yanaşmanın zəruriliyini nəzərə alaraq dəyirmi masa keçirilmişdir. “Dəyirmi masa”da akademiyanın professor-müəllim heyəti, tələbə və müdavimləri iştirak etmişlər.
Akademiyanın rektoru akademik Urxan Ələkbərov “dəyirmi masa”nı açaraq müzakirəyə çıxarılmış mövzunun fövqəl əhəmiyyət kəsb etməsi və cənab Prezident İlham Əliyevin ölkəmizin gələcək inkişafının əsaslarını müəyyənləşdirəcək “Azərbaycan 2020: gələcəyə baxış” Konsepsiyasının hazırlanmasının icrası üçün  müvafiq dövlət orqanları qarşısında qoyulan vəzifələr barədə danışdı.
Daha sonra nəzərə çatdırdı ki, sənədlə əlaqədar Prezident Administrasiyasında keçirilən “dəyirmi masa”da Administrasiyanın rəhbəri akademik Ramiz Mehdiyev sərəncamın əhəmiyyətini xüsusi qeyd edərək bildirmişdir ki, bu sənəd ölkəmizin yeni inkişaf mərhələsinə qədəm qoyması ilə bağlıdır.
Sərəncamın əhəmiyyətindən danışan rektor qeyd etdi ki, bu sənəd bütövlükdə Azərbaycanın inkişafinın yeni mərhələsi ilə səciyyələnir. Yeni inkişaf mərhələsinin əsas xüsusiyyəti qarşımızda duran məqsədlərin daha yüksək səviyyəli, çoxşaxəli olması və zamanın çağırışlarını nəzərə alınması ilə bağlıdır. Bu məqsədlərə nail olmaq üçün ciddi elmi əsaslara söykənən ən müasir idarəetmə üsullarının tətbiqi tələb edilir, strateji yanaşmaların daha uzunmüddətli dövrü əhatə etməsi zərurəti yaranır. Natiq qeyd etdi ki, elm və inkişafın planlaşdırılması və idarə edilməsinə əsaslanan səmərəli idarəetmə sistemi, davamlı inkişaf, ekoloji sivilizasiya və s. bu kimi əsasların da strategiyada öz əksini tapması sənədin əhəmiyyətini artırmaqdadır. Bu baxımdan Dövlət İdarəçilik Akademiyası strategiyanın uğurla hazırlanması və həyata keçirilməsi üçün lazimi işlərin görülməsini hədəf kimi müəyyənləşdirib.
Tədbirdə çıxış edən digər natiqlər sərəncamdan irəli gələn məqsədlərə nail olunmasında insan potensialının formalaşmasının xüsusi əhəmiyyətini qeyd etdilər və məsələ ilə əlaqədar mülahizələrini irəli sürdülər. Təşkil edilən dəyirmi masanın əhəmiyyətini ifadə edərək, bu işdə üzərilərinə düşən məsuliyyəti dərk etdiklərini bildirdilər.

Foto

DİA-nın Mətbuat və İnformasiya Xidməti