ÜMUMMİLLİ LİDERİN XATİRƏSİ DÖVLƏT  İDARƏÇİLİK AKADEMİYASINDA ANILMIŞDIR

Dekabrın 12-də Azərbaycan Respublikasının Prezidenti yanında Dövlət İdarəçilik Akademiyasında Ümummilli Lider Heydər Əliyevin xatirəsinə həsr olunmuş anım mərasimi keçirilmişdi. Mərasimdə Akademiyanın professor-müəllim, tələbə və müdavimləri iştirak etmişlər. Azərbaycan xalqının və dövlətçiliyinin tarixində müstəsna xidmətləri olmuş dahi şəxsiyyət Ulu Öndər Heydər Əliyevin xatirəsi bir dəqiqəlik sükutla yad edilmiş, Akademiyadakı büstünün önünə güllər qoyulmuşdur.
Tədbirdə Akademiyanın rektor əvəzi prof. Əlikram Abdullayev çıxış edərək Ümummilli Lider, dünya şöhrətli siyasi xadim Heydər Əliyevin xalqının qarşısındakı misilsiz xidmətlərindən danışmışdır. O qeyd etmişdir ki, Azərbaycanın müasir tarixində Ulu Öndər Heydər Əliyevin müstəsna xidmətlərinin ictimai-siyasi mahiyyəti hələ uzun illər tədqiqatçıların diqqət mərkəzində olacaq, türk dünyasının böyük oğlu, müasir Azərbaycan dövlətinin memarı və qurucusu Heydər Əliyevin xatirəsi Azərbaycan adı yaşadıqca o da daim ürəklərdə yaşayacaqdır.
Sonra Akademiyanın «Fəlsəfə və sosial psixologiya» kafedrasının müdiri, professor Tofiq Rəsulov, Magistratura şöbəsinin müdiri, professor Namiq Axundov, Aspirantura şöbəsinin müdiri, professor Musa Quluzadə çıxış edərək Azərbaycan xalqının fenomen şəxsiyyət Heydər Əliyevlə bağlı xatirələrindən, onun həyat və fəaliyyətinin müasir Azərbaycan gəncliyi üçün örnək ola biləcək məqamlarından söhbət açdılar.

Foto

DİA-nın Mətbuat Xidməti