DİA-da DƏYİRMİ MASA KEÇİRİLMİŞDİR

Noyabrın 27-də Dövlət İdarəçilik Akademiyasında görkəmli filosof alim, akademik Heydər Hüseynovun anadan olmasının 100 illiyinə həsr olunmuş “Vətənə, xalqa həsr olunmuş alim ömrü” mövzusunda dəyirmi masa keçirilmişdir.
Tədbiri Dövlət İdarəçilik Akademiyasının rektoru, əməkdar elm xadimi, professor Seyfəddin Qəndilov açaraq tədbir iştirakçılarını və qonaqları salamlamış, Azərbaycan Respublikasının Prezidenti cənab İlham Əliyevin 11 iyul 2008-ci il sərəncamına uyğun olaraq ölkəmizdə görkəmli alim, SSRİ Dövlət Mükafatı laureatı, akademik Heydər Hüseynovun xatirəsinə həsr olunmuş geniş tədbirlər keçirildiyini bildirmişdir. Rektor Azərbaycan Elmlər Akademiyasının ilk akademiklərindən biri kimi Heydər Hüseynovun ictimai və humanitar elmlərin, xüsusilə fəlsəfənin inkişafında müstəsna rolunu qeyd etmişdir. O, Azərbaycan Milli  Elmlər Akademiyasında fəlsəfi tədqiqatlar aparan Fəlsəfə İnstitutunun yaradılması, BDU-nun tarix fakültəsinin nəzdində fəlsəfə şöbəsinin açılması Heydər Hüseynovun adı ilə bağlı olduğunu bir daha vurğulamışdır. Professor Seyfəddin Qəndilov Heydər Hüseynovu görkəmli filosof, əsl elm fədaisi kimi qiymətləndirmişdir. Rektor milli mədəniyyətimizin böyük nümayəndələrinin fəlsəfi irsini sistemli şəkildə araşdıran alimin xalqımızın fəlsəfi fikir tarixinin başlıca təkamül mərhələlərini müəyyənləşdirdiyini xüsusi qeyd etmişdir.
Bakı Dövlət Universitetinin “Sosiologiya” kafedrasının müdiri, professor İzzət Rüstəmov “Heydər Hüseynov Azərbaycan “Fəlsəfə tarixi” elminin banisidir”, DİA-nın “Fəlsəfə və sosial psixologiya” kafedrasının müdiri, professor Tofiq Rəsulov “Heydər Hüseynovun fəlsəfi ənənələri müstəqil Azərbaycanda yaşayır və inkişaf edir”, Azərbaycan Texniki Universitetinin “Fəlsəfə və politologiya” kafedrasının müdiri, professor Fərrux Ramazanov “Heydər Hüseynovun elmi və ictimai fəaliyyəti alimlik etikasının canlı təcəssümüdür” mövzusunda geniş və maraqlı çıxışlar etmişlər.
Tədbirin sonunda alimin qızı Leyla Hüseynova atası haqqında xatirələrini danışmış və Heydər Hüseynova göstərilən diqqət və ehtirama görə tədbir iştirakçılarına və akademiya rəhbərliyinə öz minnətdarlığını bildirmişdir.

DİA-nın Mətbuat və İnformasiya Xidməti