"Səmərəli dövlət idarəçiliyi: zamanın çağırışları" adlı beynəlxalq konfransın iştirakçıları Suraxanı rayonunda olmuşlar

Azərbaycan Respublikasının Prezidenti yanında Dövlət İdarəçilik Akademiyasının təşkilatçılığı ilə keçirilən “Səmərəli dövlət idarəçiliyi: zamanın çağırışları” adlı beynəlxalq konfransın iştirakçıları Suraxanı rayonunda olmuşlar.
Suraxanı Rayon İcra Hakimiyyətinin (RİH) başçısı İlqar Abbasov Rusiya, Türkiyə, Qazaxıstan, Özbəkistan, Tacikistan, Polşa, Litva, Estoniya və Ukraynanın dövlət idarəçilik akademiyalarının, institutlarının və elmi mərkəzlərinin rəhbərlərinə rayon haqqında geniş məlumat vermişdir.
Qonaqlara, həmçinin RİH-in işində, xüsusilə kargüzarlıq sahəsində “Elektron İcraçı” Avtomatlaşdırılmış İdarəetmə Sistemi proqramının tətbiqi haqqında məlumat verilmiş, proqramın üstünlükləri və səmərəsi əyani şəkildə nümayiş etdirilmişdir.
Qeyd olunmuşdur ki, 2011-ci ilin ötən dövrü ərzində RİH başçısı tərəfindən 990 nəfər vətəndaş qəbul edilmiş, 2310 nəfər sakinin iştirak etdiyi 36 səyyar görüş keçirilmiş, qaldırılan məsələlərin həlli yolları birgə müzakirə olunaraq aidiyyəti qurumların rəhbərlərinə müvafiq tapşırıqlar verilmişdir.
Qonaqlar rayonda aparılan abadlıq-quruculuq işlərindən bəhs edən filmə baxmışlar.
Konfrans iştirakçıları daha sonra Suraxanı rayonu Heydər Əliyev mərkəzi ilə tanış olmuşlar. Bildirilmişdir ki, Mərkəz rayonun ideoloji qərargahına çevrilmişdir. Ulu Öndərin zəngin irsini, həyat və fəaliyyətinin müxtəlif dövrlərini öyrənmək məqsədi ilə Mərkəzə 38.500-dən çox insan müraciət etmişdir.
Konfrans iştirakçıları elektron-lektoriya zalında Mərkəzin sifarişi əsasında hazırlanmış “Millət Atası” filminə baxmışlar.
Qonaqlar, həmçinin “Atəşgah Məbədi” Dövlət Tarix-Memarlıq Qoruğunda olmuşlar.
“Atəşgah Məbədi”ndə quraşdırılmış ekranda məbədin ətrafında aparılan abadlıq işlərindən sonrakı görüntüsü slaydlar vasitəsilə nümayiş etdirilmişdir.

Foto

DİA-nın Mətbuat Xidməti