Yeni dərs ilinin başlanması  ilə əlaqədar Azərbaycan Respublikasının Prezidenti yanında Dövlət İdarəçilik Akademiyasında yığıncaq keçirilmişdir.
Yığıncağı Akademiyanın rektoru, əməkdar elm xadimi, prof. Seyfəddin Qəndilov açaraq, tələbələri, müəllimləri və eləcə də bütün kollektiv üzvlərini Yeni dərs ilinin başlanması və Bilik günü münasibətilə təbrik etdi, onlara təhsildə və işlərində müvəffəqiyyətlər, ölkəmizin tərəqqisi naminə gələcək fəaliyyətlərində yeni-yeni uğurlar arzuladı. Rektor Ümummilli liderimiz Heydər Əliyevin diqqət və qayğısı ilə yaradılmış Dövlət İdarəçilik Akademiyasının respublikamız üçün idarəçilik sahəsində mütəxəssislər hazırlanmasında önəmli olduğunu vurğulayaraq, bu istiqamətdə layiqli kadrlar yetişəcəyinə əmin olduğunu bildirdi. Təməli ulu öndər Heydər Əliyev tərəfindən qoyulmuş bu təhsil ocağının daim inkişaf  etdiyini, bu il ali məktəbin magistratura pilləsinə keçirilən qəbul imtahanlarında Akademiya məzunlarının yüksək bal toplayaraq respublikamızın müxtəlif təhsil ocaqlarına daxil olduğundan söz açan rektor, möhtərəm Prezidentimiz İlham Əliyevin gənclərimiz qarşısında qoyduğu vəzifələri yerinə yetirmək üçün onlara daim öz üzərlərində işləməyi, daha yüksək göstəricilər əldə etməyi tövsiyə etdi.
Rektor ölkə Prezidenti İlham Əliyevin tələbələrin və aspirantların maddi vəziyyətlərinin yaxşılaşdırılması üçün təqaüdlərinin artırılmasına dair, həmçinin qəbul imtahanları zamanı yüksək bal toplayan tələbələr üçün Prezident təqaüdünün artırılmasına dair bu günlərdə imzaladığ ı sərəncamların əhəmiyyətindən danışaraq, Prezidentin bu qayğı və diqqətini yüksək qiymətləndirdi. Bu tədbirlərin onların maddi vəziyyətinin yaxşılaşdırılmasına kömək olduğunu diqqətə çatdıran rektor, onların arasında Akademiyadan 25 nəfər gəncin də Prezident təqaüdünə layiq olduğunu qeyd edərək, bir daha bu il Akademiyaya ən yüksək balla daxil olmuş gəncləri təbrik etdi.
“İqtisadiyyatın dövlət tənzimlənməsi” kafedrasının müdiri Roza Əliyeva yeni dərs ilinin başlanması münasibətilə tələbə və müəllimləri təbrik edərək, onlara təhsildə uğurlar arzuladılar. Prezident təqaüdçüləri – qəbul imtahanında 700 bal toplamış, Siyasi idarəetmə fakültəsinin I kurs tələbəsi Mirzəyev Rəşad, İnzibati idarəetmə fakültəsinin I kurs tələbəsi Elvin Dadaşov çıxışlarında nüfuzlu ali məktəb olan Dövlət İdarəçilik Akademiyasına daxil olmalarını həyatlarının ən sevincli, ən unudulmaz anlarından olduğunu qeyd edərək, Prezident yanında olan bu təhsil ocağına qəbul edilmələrindən böyük qürur duyduqlarını bildirdilər.
Valideynlərdən Abdullayev Şamil, Ağayev Elməddin çıxış edərək övladlarının İdarəçilik Akademiyasına qəbul olunmaları ilə fəxr etdiklərini vurğulayaraq, tələbələrin təhsil almaları üçün hərtərəfli şərait yaratmış Akademiya rəhbərliyinə öz minnətdarlıqlarını bildirdilər. İlk təhsil günü tələbələrin Akademiya ilə tanışlığı ilə başa çatdı.
DİA-nın Mətbuat və İnformasiya Xidməti
|
Dövlət