Dövlət İdarəçilik Akademiyasında soyqırım qurbanlarının xatirəsi
yad edilmişdir

Azərbaycan Respublikasının Prezidenti yanında Dövlət İdarəçilik Akademiyasında 31 mart - azərbaycanlıların soyqırımının anım günü keçirilmişdir.
Yığıncaq başlanmazdan əvvəl soyqırımın günahsız qurbanlarının əziz xatirəsi bir dəqiqəlik sükutla yad edilmişdir.
Tədbiri Akademiyanın rektoru, əməkdar elm xadimi, prof.Seyfəddin Qəndilov açaraq, soyqırımın tarixindən, bu illər ərzində müsibətlərimizin dünya ictimaiyyətinə və beynəlxalq təşkilatlara çatdırılması istiqamətində respublikamızda həyata keçirilmiş işlərdən, keçən dövr ərzində Ümummilli liderimiz Heydər Əliyevin soyqırımla əlaqədar gördüyü işlərdən danışmışdır. Rektor çıxışında erməni millətçilərinin və daşnaklarının "Böyük Ermənistan" yaratmaq xülyası ilə zaman-zaman yeni-yeni fəlakətlər törətmələrindən, erməni kilsəsi və lobbisinin fəal və çirkin təbliğatı nəticəsində XIX-XX əsrlər ərzində soyqırım və deportasiyaya məruz qalmış xalqımızın başına gətirilən müsibətlər barədə bir daha məlumat vermiş, möhtərəm Prezidentimiz İlham Əliyevin bu istiqamətdə gördüyü işlərin əhəmiyyətindən söz açmışdır.
Aspirantura şöbəsinin müdiri dosent Musa Quliyev, İxtisasartırma fakültəsinin birinci kurs müdavimi Həbibov Həmid, Siyasi İdarəetmə fakültəsinin tələbəsi Axundova Jalə öz çıxışlarında bu tarixi gün haqqında, mənfur erməni siyasəti və bu siyasətin havadarları tərəfindən əsrlər boyu başımıza gətirilən yeni faciələr barədə danışaraq, bu istiqamətdə daha böyük işlər görməyin vacibliyini qeyd etmiş, bu məsələlərin beynəlxalq ictimaiyyət və beynəlxalq təşkilatlar tərəfindən tezliklə həqiqi qiymətini alacağına əmin olduğunu bildirmişlər.
Sonda tələbələrin iştirakı ilə günahsız qurbanların xatirəsinə həsr olunmuş ədəbi-bədii kompozisiya göstərilmişdir.

DİA-nın Mətbuat və İnformasiya Xidməti