Akademiyanın yaradılması dövlətin möhkəmlənməsi və elmi əsaslarla idarə edilməsi baxımından mühüm əhəmiyyətə malikdir.
         Hər il DİA-nın Siyasi idarəetmə və İnzibati idarəetmə fakültələrinə test üsulu ilə təhsilin bakalavr pilləsinə 200 nəfər, magistratura pilləsinə 50 nəfər tələbə, Kadrların ixtisasartırması və yenidən ixtisaslaşması fakültəsinin əyani və qiyabi şöbələrinin müdavimləri sırasına respublikanın müxtəlif dövlət orqanlarında çalışan 75 nəfər gənc məmur qəbul olunur. Akademiyada həmçinin, müxtəlif istiqamətlər üzrə qısamüddətli kurslar da fəaliyyət göstərir. Bu kurslarda il ərzində 8 istiqamət üzrə 300 nəfər rəhbər işçi təhsil alır. Müdavimlər qarşısında müntəzəm olaraq Milli Akademiyanın, müxtəlif ali məktəblərin görkəmli alimləri və eləcə də dövlət və qeyri dövlət orqanlarında yüksək vəzifələrdə çalışan təcrübəli mütəxəssislər və  rəhbər işçilər çıxış edirlər.
         Tələbə həyatını canlandırmaq, tələbələri elmə və Akademiyanın ictimai həyatına fəal cəlb etmək üçün Gənclər Təşkilatı, Tələbə Həmkarlar Təşkilatı, Tələbə Elmi Cəmiyyəti, həmçinin, əməkdaşların hüquqlarını qorumaq, məişətləri ilə bağlı məsələlərin həllinə kömək göstərmək məqsədilə Akademiya Həmkarlar Komitəsi və həmçinin Qadınlar şurası yaradılmışdır.
         Təhsillə yanaşı, Akademiyada professor-müəllim heyəti və tələbələr üçün müntəzəm olaraq rəngarəng tədbirlər keçirilir.
         Qısa zamanda beynəlxalq əlaqələr sahəsində də bir sıra addımlar atılmışdır. Akademiyada Fransa, Kanada, Türkiyə, o cümlədən, bəzi MDB ölkələrindəki analoji tədris müəssisələrinin  fəaliyyəti öyrənilir.
         Azərbaycan-Avropa layihəsinin tərkib hissəsi olaraq TEMPUS-TASİS proqramı üzrə Fransanın Qrenobl, Bordo Siyasi Elmlər İnstitutları və İspaniyanın Barselona Universiteti ilə birgə fəaliyyətə əsasən inzibati strukturların rəhbərləri və əməkdaşları təcrübə keçmək üçün bu ölkələrdə olmuşlar.
        Akademiya YUNESKO ilə əməkdaşlığa da mühüm əhəmiyyət verir. Belə ki, burada İnsan Hüquqları, Demokratiya və Sülh problemləri üzrə YUNESKO Mərkəzi fəaliyyət göstərir.
        Dövlət İdarəçilik Akademiyasında təhsil çoxpilləli sistem əsasında aparılır: tələbələr bakalavr pilləsi üzrə 4 il, magistr pilləsi üzrə 2 il təhsil alırlar. Həmçinin təhsildə Boloniya sisteminin tətbiqinə başlanılmışdır. Tələbələrin biliyinin qiymətləndirilməsi çoxballı sistemə əsaslanır. Bundan başqa DİA-da həmçinin, vətəndaşların qiyabi yolla ikinci ali təhsil almaları və ixtisaslarının artırılması  üçün də imkan yaradılmışdır.
         Mütəmadi olaraq Dövlət İdarəçilik Akademiyası Prezident Aparatı və ölkənin digər dövlət və qeyri dövlət strukturları ilə əməkdaşlıq edərək Azərbaycanın regionlarının icra hakimiyyəti nümayəndələri ilə müxtəlif mövzularda, o cümlədən idarəetmədə İnformasiya Kommunikasiya Texnologiyalarının tətbiqi üzrə seminarlar, dəyirmi masalar və treninqlər keçirir.
        Eyni zamanda müxtəlif xarici ölkələrin Azərbaycandakı səfirliklərinin nümayəndələri, Prezident Aparatının və Milli Məclisin səlahiyyətli nümayəndələrinin iştirakı ilə müxtəlif tədbirlər və işgüzar görüşlər keçirilir.
Avropa və MDB ölkələrindəki uyğun strukturlarla Dövlət İdarəçilik Akademiyasının  qarşılıqlı əməkdaşlığı nəticəsində onların iş təcrübələri də öyrənilir.