Dövlət İdarəçilik Akademiyasının Həmkarlar İttifaqı Komitəsi öz işində Azərbaycan Respublikasının Konstitusiyasını, “Həmkarlar İttifaqları haqqında” Azərbaycan Respublikasının Qanununu, Dövlət İdarələri və İctimai Xidmət İşçiləri Həmkarlar İttifaqları Respublika Komitəsinin əsasnaməsini, Dövlət İdarəçilik Akademiyasının rəhbərliyi ilə əldə olunan razılaşmanı və bu sahədə qüvvədə olan digər hüquqi normativ aktları rəhbər tutur və bu əsasda öz işini təşkil edir.
Dövlət İdarəçiliyi sahəsində yeganə təhsil ocağı olan, idarəçi kadrlar hazırlayan Dövlət İdarəçilik Akademiyası yarandığı gündən respublikanın ali məktəbləri arasında öz nüfuzu və reytinqi ilə seçildiyinə görə ictimaiyyətin geniş rəğbətini qazanmışdı.
Elə bunun nəticəsidir ki, ali məktəblər içərisində reytinqə görə Akademiyamızın adı birincidir. Heç təsadüfi deyildir ki, hər il Azərbaycan Respublikasının Prezidenti tərəfindən ali məktəblərə ən yüksək balla qəbul olunan tələbələrin 100 nəfərinə “Prezident təqaüdü”  verilir. Həmin təqaüdə layiq görülənlərin 25-30%-i məhz İdarəçilik Akademiyasının tələbələri olur.
İdarəçilik Akademiyası üzrə 286 nəfər əməkdaş, 550 nəfər tələbə Həmkarlar İttifaqı Komitəsinin üzvüdür. Siyasi İdarəetmə və İnzibati İdarəetmə fakültələrində birlikdə 48 qrup var. Bu qrupların hər birində tələbələrin iştirakı ilə qrup həmkarlar təşkilatının sədri seçilir və onlar Akademiyada keçirilən tədbirlərin təşkilində yaxından iştirak edirlər.
Həmkarlar İttifaqı Komitəsi dövlətçiliyimizin, müstəqilliyimizin möhkəmləndirilməsi və inkişafı yolunda öz bilik və bacarığını əsirgəməyən əməkdaşların sosial, əmək, istirahət hüquqlarının qorunmasına xüsusi qayğı ilə yanaşır, Akademiyada çalışan hər bir  əməkdaşın və  tələbənin problemlərinin müsbət həlli üçün imkanlardan səmərəli istifadə edir.
Həmkarlar İttifaqı Komitəsinin əsas məqsədlərindən biri də Dövlət Gənclər Siyasətinin həyata keçirilməsi istiqamətində tələbələrin maraqlarını təmsil və müdafiə etmək, İdarəçilik Akademiyasının, eləcə də respublikanın ictimai, mədəni, və elmi həyatında onların fəal və uğurlu iştirakını təmin etməkdən ibarətdir.
Təbiidir ki, cəmiyyətdə gənclərin fəallığının artırılması istiqamətində həmkarlar təşkilatlarının rolunun artırılması üçün çox işlər görmək lazım gəlir. Hər bir cəmiyyətdə gənclər aparıcı qüvvə olublar. Bu qüvvədən səmərəli istifadə etmək üçün xüsusi proqramlar hazırlanmalı və həyata keçirilməlidir. Akademiyanın Həmkarlar İttifaqı Komitəsi də illik iş planına uyğun olaraq bu tədbirlərin həyata keçirilməsini hədəf kimi qarşıya qoymuşdur.
Akademiyamızda intellektual və idman yarışlarının keçirilməsi, tələbələr arasında neqativ meyllərə qarşı profilaktik tədbirlərin həyata keçirilməsi, asudə vaxtlarının səmərəli təşkil edilməsi, festivalların, forumların, dəyirmi masaların, kütləvi təbliğat kompaniyaların, diskussiya klublarının, səyahətlərin təşkil edilməsi tələbələrin kütləvi iştirakını və fəallığını təmin edən amillərdəndir. Təcrübə göstərir ki, məhz bu tədbirlər tələbələrin Həmkarlar Təşkilatına üzv olmalarına və sıralarının artmasına səbəb olur. 
Müstəqil Azərbaycan Respublikasının inkişafı naminə Dövlət İdarəçilik Akademiyasının dövlət idarəçiliyi üçün yeni milli kadrların hazırlanması sahəsində Həmkarlar İttifaqı Komitəsi öz üzərinə düşən məsuliyyəti dərk edir və ona göstərilən etimadı doğrultmağa çalışır.