Dövlət İdarəçilik Akademiyası hazırda dünyada mövcud olan hökumətlərarası sazişlər, ali məktəblərlə, xarici idarə və təşkilatlarla müqavilələr, dövlət qulluğu kadrlarinin hazırlanması məsələləri üzrə beynəlxalq və milli birliklərin, idarələrin və təşkilatlarin layihələri çərçivəsində Azərbaycan Respublikası Prezidenti İcra Aparatının beynəlxalq əməkdaşlıq proqramlarını  həyata keçirir.
Dövlət İdarəçilik Akademiyası fəaliyyətə başladığı vaxtdan Avropa Birliyinin bir neçə layihəsin iştirakçısı olmuşdur: TEMPUS-TACİS proqramı çərçivəsində 1999-2001-ci illər ərzində Fransanın Bordo və Qrenobl Siyasi Elmlər institutları, İspaniyanın Barselona universiteti ilə əməkdaşlıq etmiş və mövcud proqramlar çərçivəsində bu ali məktəblərlə birlikdə «Avroazer. Modernləşdirilmiş idarəetmə və beynəlxalq aləmə çıxış» layihəsinin  həyata keçirilməsində iştirak etmişdir.
Yaradılan konsorsiuma Dövlət İdarəçilik Akademiyası, Qrenobl Siyasi Elmlər İnstitutu, Bordo Siyasi Elmlər İnstitutu, Barselona Universiteti daxil olmuş, müqavilələr və niyyət protokolları imzalanmışdır.
Layihənin əsas məqsədi - DİA-nın inzibati strukturlarının təkmilləşdirilməsi və inzibati proseslərin (idarəetmə xidmətlərinin, maliyyə idarəçiliyinin, sənədləşdirmənin) qanunun tələblərinə uyğun şəkildə modernləşdirilməsinə nail olmaq olmuşdur.
Bununla yanaşı, layihədə kitabxana işinin müasirləşdirilməsi və kompüterləşdirilməsi, ümumilikdə Akademiyanın müasir kompüterlərlə təchiz olunması və beynəlxalq şəbəkəyə qoşulması da nəzərdə tutulmuş və uğurla həyata keçirilmişdir.
2003-cü ildə Avropa İttifaqının Dövlət qulluğu sahəsində islahatların həyata keçirilməsinə yardım üzrə TASİS proqramı layihəsi Dövlət İdarəçilik Akademiyasının binasında öz ofisini açmışdır. 2004-cü ilin sonunadək davam etdirilməsi nəzərdə tutulan layihə «Dövlət qulluğu haqqında» Azərbaycan Respublikası Qanununun icra olunması strateqiyasının, eləcə də dövlət qulluğuna dair təlimatların işlənib hazırlanmasına, Azərbaycan Respublikası Dövlət Qulluğunu İdarəetmə Şurasının fəaliyyətinin təşkilinə, dövlət qulluğu sahəsində heyətin idarə edilməsinə dair mərkəzləşdirilmiş məlumat bazasının yaradılmasına, müvafiq tədris materiallarının, habelə dövlət idarəetməsi sistemi səhəsində islahatlar strategiyasının hazırlanmasına yardım etmək məqsədi daşımışdır.
Son illərdə Dövlət İdarəçilik Akademiyası aşağıdakı tədris ocaqları ilə protokollar imzalamışdır : Paris Milli Ali İdarəçilik Məktəbi (2002-ci il), Belarusiya Prezidenti yanında İdarəçilik Akademiyası (2002-ci il), Ukrayna Prezidenti yanında Dövlət İdarəçilik Akademiyası (2002-ci il), Türkiyə və Orta Şərq Dövlət İdarəetməsi İnstitutu (11 may 2003–ci il), Kanada Beynəlxalq Təhsil Bürosu (1 oktyabr 2003), Litva Dövlət Idarəçilik İnstitutu (29 iyun 2004), Jenevrə Beynəlxalq Tədqiqatlar İnstitutu (13 iyul 2005).
Fransanın Azərbaycandakı Səfirliyinin təşkilatçılığı ilə Paris Ali Milli İdarəçilik Məktəbi (ENA) və Azərbaycan Respublikasının Prezidenti yanında Dövlət İdarəçilik Akademiyası arasında «Dövlət İdarəçilik Akademiyasının inkişafına dəstək» layihəsi müvəfəqiyyətlə həyata keçirilir.
8 il müddətində davam edən əməkdaşlıq bütün dünyada tanınan bu nüfuzlu təhsil ocağı ilə İdarəçilik Akademiyasının əlaqələrinin genişlənməsi və təcrübə mübadiləsində çox mühüm rol oynayır. Dünyanın məşhur siyasətçilərinin, tanınmış dövlət xadimlərinin məzunu olduğu Paris Ali Milli İdarəçilik Məktəbi 1945-ci ildən- yarandığı ilk gündən fəaliyyətini dövlət başçılarının, diplomatik nümayəndələrin, dövlət məmurlarının hazırlanması istiqamətində qurmuşdur. Belə bir nüfuzlu ali məktəblə əlaqələr, şübhəsiz ki, respublikamızda idarəçilik kadrlarının hazırlanması və dövlət məmurlarının ixtisaslarının artırılması işinə böyük köməkdir.
Layihə çərçivəsində ENA tərəfindən İdarəçilik Akademiyasına müxtəlif vaxtlarda göndərilmiş dövlət qulluqçuları və həmin məktəbin müəllimləri  Rafael Hadas Löbel, ərazi administrator Patrik Noddinqs, Fransa Baş nazirinin texniki məsələlər üzrə müşaviri, cənab Jan Benua Albertini, prefekt, baş administrasiya üzrə müfəttiş Daniel Limodin, hesablama palatasının auditoru Frank Besset, Fransa Dövlət Şurasının məruzəçisi Bernar Pinorol və Paris  Panteon Sorbon Universitetinin professoru Jerar Timsit, Hesablama Palatasının baş müşaviri xanım Klod Trupən Dövlət İdarəçilik Akademiyasının əməkdaşlarının və  dövlət məmurlarının da daxil olduğu qruplarda seminarlar keçirmişlər. Onlar öz mühazirələrində Fransanın dövlət idarəçiliyi sahəsindəki təcrübəsi, Fransa modeli haqqında ətraflı məlumat vermiş, geniş müzakirələr aparmışlar.
Məsələn, 2002-2006-cı illərdə həyata keçirilməsi nəzərdə tutulmuş layihəyə əsasən azərbaycanlı mütəxəssislər 2006-ci ilin mart ayının 17-dən-25-dək ENA-da təcrübədə olmuşlar.
Proqram çərçivəsində Azərbaycan Respublikası Prezidentinin İcra Aparatının, Milli Məclisin bir neçə məsul əməkdaşı və  Akademiyanın bir qrup müəllimi  Fransanın Paris və Strasburq şəhərlərində təcrübədə olmuş, bir sıra tədbirlərdə iştirak emişlər. 
Proqramın sonunda azərbaycanlı mütəxəssislərə sertifikatlar verilmişdir.
Ölkələrimiz arasında  idarəçilik üzrə təhsil əlaqələrini genişləndirmək məqsədilə 2007-ci ilin oktyabr ayının 6-dan 13-nə kimi Dövlət İdarəçilik Akademiyasının rektoru, əməkdar elm xadimi, prof. S.T.Qəndilov, tədris işləri üzrə I prorektor prof. Ə.Abdullayev, Beynəlxalq əlaqələr şöbəsinin müdiri  L.F.Əhmədova və Dillər kafedrasının müəllimi Ş.Ağalarova Fransanın Paris, Strasburq və Mets şəhərlərində fəaliyyət göstərən Ali İdarəçilik məktəblərində (ENA-da)  işgüzar səfərdə olmuşlar.
Nümayəndə heyətimizin Fransaya səfəri Paris Milli İdarəçilik Məktəbi  haqqında daha ətraflı informasiya alması və mövcud olan əlaqələrin genişlənməsi baxımından əhəmiyyətli olmuşdur. 
Dövlət İdarəçilik Akademiyası ilə Türkiyə və Orta Şərq Dövlət İdarəetmə İnstitutu arasında da protokol imzalanmışdır. Ölkələrimiz arasında idarəçilik üzrə təhsil əlaqələrini genişləndirmək məqsədilə 2003-cü ilin may ayının 21-də imzalanmış bu mühüm əhəmiyyətli sənəd Türkiyə və Orta Şərq Dövlət İdarəetmə İnstitutunun rektoru, prof. doktor Turqay Ergünün ölkəmizə  səfəri zamanı həyata keçirilmişdir.
Sənəddə tərəflər arasında dövlət idarəçiliyi kadrlarının hazırlanması və ixtisasların artırılması sahəsində birgə tədbirlərin həyata keçirilməsi, elmi əsərlərin, dərsliklərin, tədris-metodik və analitik informasiya materiallarının nəşri, müəllimlərin və inzibati heyətin staj keçmələri, ixtisaslarının artırmaları, tələbə və müdavimlərin təhsil almaları üçün şərait yaradılması və başqa məsələləri əks etdirilmışdır .
Bu layihəyə əsasən 2003-cü ilin sentyabr ayında maqistratura şöbəsinin və 2004-2008-ci illərin sentyabr aylarında «Rəhbər kadrların ixtisasının artırılması» fakültəsinin bir neçə dinləyicisi  Türkiyə və Orta Şərq Dövlət İdarəetmə İnstitutuna ezam olunmuşlar.
DİA və Kanada Beynəlxalq Təhsil Bürosu arasında 2003-cü il sentyabrın 1-də bağlanmış müqavilə əsasında əməkdaşlığımız bu gün də davam etməkdədir.
2006-ci ilin dekabran 23-də Dövlət İdarəçilik Akademiyasında Kanada Beynəlxalq İnkişaf Agentliyi və onun ixtisaslaşmış qurumu olan Kanada Beynəlxalq Təhsil Bürosu, eləcə də DİA-nın birgə həyata keçirdikləri «Dövlət siyasəti sahəsində beynəlxalq bilik standartlarının tətbiqi (PPKN)» saytının təqdimat mərasimi keçirilmişdir.
Yeni sayt bir neçə bölmədən- dövlət siyasətinin təhlili, iqtisadi təhlil, dövlət siyasətinin gender təhlili, elektron hökümət, dövlət qulluğu etikası və digər mövzular üzrə bölmələrdən ibarətdir. Hər bölmədə bu istiqamətlər üzrə mövcud materiallar, məqalələr, kitab və ensiklopedik materiallar toplanmışdır. Bununla yanaşı, layihə çərçivəsində respublikamızda ilk dəfə olaraq Azərbaycan dilində 3 istiqamət üzrə DİA-nın müəllimləri tərəfindən hazırlanmış dərs vəsaitləri və ingilis dilindən Azərbaycan dilinə tərcümə edilmiş bir neçə kitab yerləşdirilmişdir.
Saytın strukturunda bir sıra xüsusiyyətlər mövcuddur. Belə ki, sayta materiallar yerləşdirmək imkanı olan şəbəkə üzvləri ilə yanaşı, istənilən internet istifadəçisi burada yerləşdirilmiş materiallardan istifadə edə bilər.
Sayta həmçinin müntəzəm olaraq Azərbaycanla bağlı yeniliklər və maraqlı məlumatlar yerləşdirilir. Saytın daha da dolğun olması istiqamətində işlər davam etdirilir.
Akademiyamızın beynəlxalq əlaqələrində Litva Dövlət idarəçilik İnstitutu ilə  əməkdaşlıq haqqında bağlanan müqavilə mühum yer tutur.
2004-cü ilin sentyabrın 28-dən oktyabrın 2-dək Dövlət İdarəçilik Akademiyasının rektoru prof. S. Qəndilov və Akademiyanın I prorektoru  prof. Ə. Abdullayev dövlət idarəçiliyi sahəsində kadr hazırlığı və onların ixtisasartırılması sahəsində toplanmış təcrübəni öyrənmək məqsədi ilə Litva Respublikasında ezamiyyətdə olmuşlar. Səfər zamanı Avropa İttifaqına yenicə qəbul olunmuş bu ölkədə qeyd olunan sahədə aparıcı təhsil, tədqiqat və təlim mərkəzləri olan Litva Dövlət İdarəçiliyi İnstitutunda, Litva Dövlət Hüquq Universitetində, bələdiyyə idarəçiliyi üzrə «Daynana» (Druskininkay) təlim mərkəzində görüşlər keçirilmiş və ikitərəfli əməkdaşlıq imkanları müzakirə edilmişdir. Müzakirələrin nəticəsi olaraq 2004-cü ilin iyun ayının 29-da Litva Dövlət İdarəçiliyi İnstitutu ilə ikitərəfli əməkdaşlığa dair müqavilə imzalanmışdır. Bu müqavilə əməkdaşlığın aşağıdakı formalarda həyata keçirilməsini nəzərdə tutur: dövlət qulluqçularının ixtisasartırmasını təkmilləşdirmək üçün təcrübə mübadiləsi, dövlət müəsissələri heyətinin peşə vərdişlərinin artırılması məqsədi ilə müəllim və mütəxəssislər mübadiləsi,dövlət idarəçiliyi sistemində islahatlar aparılması səhəsində təcrübə mübadiləsi və s).
Bu sənədə əsasən Avropa İttifaqının fəaliyyəti ilə bağlı Litva parlamentinin deputatı, vaxtilə Avropa Komisiyasının Baş direktoru olmuş Pətras Auştraviçus  dəfələrlə Akademiyada  Azərbaycan Respublikasının Prezidentinin İcra Aparatının, Milli Məslisin, müxtəlif nazirliklərin, icra strukturlarının nümayəndələri və akademiyanın əməkdaşları və müəllimləri üçün « Avropa İttifaqına üzvlüyə daxil olmaq üçün hazırlq prosesi»,  «Avropa İttifaqının iqtisadi və büdcə siyasəti»,  « Avropa İttifaqının hüquqi əsasları», «Avropa İttifaqının maliyyələşdirdiyi proqramlara» mövzusunda treninqlar keçirmişlər .
DİA rəhbərliyi  Litva Dövlət İdarəçilik İnstitutu ilə ikitərəfli əlaqələrin inkişafına ciddi əhəmiyyət verir və bu istiqamətdə xüsusi iş aparır.
        ABŞ-ın Azərbaycandakı səfirliyinin dəstəyi ilə ABŞ-ın «Fulbrayt» proqramının təqaüdçüləri İraq Baş Proqramının koordinatoru, Missisipi Universtitenin professoru Kessi Stromayl Qolden və Sent- Paul şəhərinin Minesota ştatında Vilyam Mitçel Hüquq Kollecinin  Professoru, eləcə də Corctaun Universitetini mərkəzinini və ABŞ-nın hüquq Assosiasiyasının həqiqi üzvü, Jessika Pouley Hayden  DİA-da bir neçə ay ərzində sissilə mühazirələr oxumuşlar.
Dövlət İdarəçilik Akademiyasının Beynəlxalq əlaqələri arasında Almaniya ilə saxlanılan elmi əlaqələr də mühüm əhəmiyyət kəsb edir. Beynəlxalq əlaqələrin inkişafını diqqət mərkəzində saxlayan Akademiyanın rəhbərliyi Almaniyanın DİAD, QTZ, Fridrix Nauman Ştiftunq fondları ilə əlaqə yaratmışdır. Bu təşkilatların təşəbbüsü ilə Akademiyada Almaniyanın tanınmış dövlət xadimləri  ilə görüşlər keçirilmişdir.
DİA üçün dünyanın bütün dövlətlərinin, ö cümlədən İsveçrənin dövlət idarəçiliyi sahəsində zəngin təcrübəyə malik olan regional təhsil ocaqları ilə qarşılıqlı faydalı əməkdaşlıq və dostluq əlaqələri qurmaq çox böyük əhəmiyyət kəsb edir.
Odur ki, 2005-ci ilin iyul ayının 12-də Cenevrə Beynəlxalq Tədqiqatlar İnstitutu ilə DİA-da  arasında əməkdaşlıq müqaviləsi imzalanmışdır.
İsveçrə İnkişaf və Əməkdaşlıq Təşkilatının dəstəyi ilə 1997-ci ildən etibarən fəaliyyət göstərən “Beynəlxalq əlaqələrlə imkanların genişlənməsi”  layihəsi (Capacity Buildung in International Relatios Project, http// www.cabir.org)  üzrə indiyədək Cənubi Qafqazda 14 belə layihə həyata keçirilmişdir. Əsas məqsədi gənc dövlət qulluqçuların gələcək inkişafına kömək göstərmək olan layihə bu istiqamətdə dövlətlərarası əlaqələrinin inkişafında böyük əhəmiyyətə malikdir.
Bu vaxtdan etibarən Azərbaycan Respublikasının Prezidenti yanında Dövlət İdarəçilik Akademiyasında İsveçrə İnkişaf və Əməkdaşlıq Təşkilatının (SDC)  Cənubi Qafqaz üzrə əlaqələndirici ofisinin dövlət orqanlarında çalışan gənc əməkdaşları üçün «Beynəlxalq ticarət siyasəti və ümumdünya ticarət təşkilatı», «İnsan hüquqları»  adlı təlim kursları öz işinə başlamışdır.
Cenevrə Beynəlxalq Tədqiqatlar İnstitutunun Akademiya ilə birgə təşkil etdikləri kurslarda Azərbaycanın və Gürcüstanın  Xarici işlər, İqtisadi İnkişaf, Kənd Təsərrüfatı, Milli Təhlükəsizlik nazirlikləri, Milli Bank, Ali Məhkəmə, Konstitusiya Məhkəməsi və digər təşkilatlarda çalışan mütəxəssislər iştirak etmişər.
Azərbaycan Respublikasının Prezidenti yanında Dövlət İdarəçilik Akademiyası, Almaniyanın Kil Universiteti, Rusiya Elmlər Akademiyasının Dövlət və Hüquq İnstitutu və Qazaxstanın Əl-Fərabi adına Milli Universiteti ilə birgə «Azərbaycan, Gazaxstan və Rusiyada xarici investisiya hüququ» layihəsi çərçivəsində 21-23 noyabr 2008-ci il tarixdə « İnvestisiya müqavilələrinin hüquqi aspektləri» mövzusunda beynəlxalq elmi-praktik konfrans keçirilmişdir. Konfransda Almaniyadan prof. Trunk və prof. Hausman, İnqiltərənin Cefri Salivan, Rusiyadan prof. Velyaminov, prof. Prof. Faxruddinov, Qazaxstandan prof. Moroz, prof. Suleymenov, YQTKTAD-dan cənab Hamed Al-Kadi, MİQA-dan cənab Tomas Mahaffi və digər qonaqlar iştirak etmiş və müxtəlif maraqlı məruzələrlə çıxış etmişlər.
Bununla yanaşı layihə çərçivəsində Dövlət İdarəçilik Akademiyasında «İnvestisiya hüququ sektoru» yaradılmışdır.
DİA-nın müəllim və tələbələrinin Azərbaycanda fəaliyyətdə olan xarici ölkə səfirlikləri və beynəlxalq təşkilatları ilə vaxtaşırı görüşləri təşkil olunur.
2010-cü ildə Dovlət İdarəçilik Akademiyasının beynəlxalq əlaqələrinin daha da genişlənməsi nəzərdə tutulur.